Pexşan

Qamişlo
 

Qamişlo

îro roja te ye

tu Amed, Mehabad, û Hewlêrî,

li bejna xwe dipêçî...!!

 Çiya êdî nema xew dikin

xwe bi ser te de diçimînin,

û sirûda te

kurên te dubare dikin

û dikin

ji te fêrî evîn û serhildanên

demhej, denghej, serhej, û avhej dibin...

 Qamişlo

tu sirûd, zeytûn û ala dawîyî

de xwe bi bêhna wan şehîdan bipêçî

bila tu xewn û hêviya dawî bî

 Qamişloka evînê

îro tu bûyî Qamişloka xwînê!!

tu nameya dawîyî

tu hêviya dawîyî

tu pêxemberê dawîyî

de nameya bi evînê pêçayî

bighînî Zerdeştê kal û Ahoramezda

bila bilez bi hawara {Gîvara û Ferhad}* ve bên

bila guleyên har û dîn

di guldankan de îfade bikin

Qamişlo

te xetîre û hêrsa Kawa dubare kir

sirûd li pey sirûdê dubare kir

û keleh li pey kelehê

serî li pey serî

û nimêj li pey nimêjê

dubare dibin

dubare li pey dubare

tu bûyî Ferîde

tu bûyî Zînê

tu bûyî Xecê û Şêrîn

tu jî dubare kirin

tu bûyî Narîna nazik û xweşik

tu jî dubare û kelogirî kirin

Qamişlooo

de bide ber xwe qirêja salan

bila hêrsa te biherike

bila qirêja salan li ber xwe bibe

rojekê..du rojan bibe bajarê hêrsê

bibe gurkan û xezeba xwedayekî dîn

ez zanim diltenikiya te nafûre

nazenîniya te ji evînê re girre,

de gur bibe, gir bibe, germ bibe

bila dinya dengê te yî beybûnî û qedefeyî bibhîze

bila balyozxaneyên evînê

li ser lêvên te yî qurmizî vebin û pir bin

bila ramûsana dawî

lidûv rûxandina pûtê dawî be

bila germ be,

bila dirêj be.

bila germ be,

bila dirêj be

*Gîvara û Ferhad du xortên kurd li Qamişlo şehîd bûn..