pexşan

-----------------------------

Bagera sinbilan

Ez, ez im,

Û bila dara beriwê di navbera min û te de

Dilbijokiyên serê salê û binê salê

Bijmêre û mîna nîşanan bi sênga min û te veke

Bila serê sibehan bi te şewata nava bihîvan nîgar bike

Dîsa ko tu hatî dest vala neyê,

Bila hema ramûsanek xiloxavî di destê te debe

Û qeymaxê hinguvandinê ji bîra meke

Laşê te serma tava heyvê girtiye

Ji min dûr nekeve

Xwe bi dilxweşkirinê germ neke

Bila siya te dirêj bibe

Û di dûv re ta siyan bijmêre

Tê nîşana hevdîtinê di serê rimê de bibînî

Wê çaxê tê berfa bakur di xew de dawerivînî ser kezeba ew ê han

Bila sinbilek tim û tim diber guhê te debe

Tê bi girtina her du heyvan tiştekî li dû xwe nehêlî

Jixwe tim û tim bila serê êvaran çavên te di neqşa germ de bin

Û sirûda hatina siwaran bi stêra sibê bide nasîn

Xemla kadizan li xwe neke

Tenê bayê bê qermîçonk bila di paxila te debe

Û xwe ji karwanê dawî dûr mexîne

Ez ê te li ser sînorê dawî xelat bikim

Eger te hemû stêrik binav kirin

Bagera sinbilan li dûv te ye, dema tu xwe di bin siya baranê de veşêrî.

Eger te hemû lavij bicih kirin

Fala pîrejina kol ji bîra meke

Jixwe li wir hemû pût serê xwe hildidin

Dê doza mayîna germ û sar li te bikin

Xwe nede viyalî wiyalî

Dawiya dawî tê jî nifiran li stêrka sibê û lavija dawî bike

Serê xwe di bin siya ew ê han de qilûz mek

Her lehiyek paqijiyê bi xwe re tîne

Dilê te jî lehiya dawîye, belkî jî zembîla şûnmayên giyasêvk û kulîlkan e.

Sibe dema tu şiyar bibî tê nîşana min li ber serê xwe bibînî

Tê bi ramûsana biçî sicûda hevdîtina dastana kesk

Û ez,

Ez ê tiştekî din ji bilî lorandina giyanê te nekim

Bila ez û tu yên dawî bin

Di jimartina ava tahl de

Û şûna qamçiyan li ser hinaran xaç neke

Mane hinar berê sor û nazik in.

01/09/2008

Ji bo rojbuyîna wê, ya piştî bagera sinbilan, dîsan sinbilan diçîne, dako sinbil sinbilan bixwin…