Pirtûk

-----------------------------

Pirtûka “Serok û Merok” Ya Qado Şêrîn Ji Nav Weşanên Sema Derket

Dezgeha Sema ya Çandî û Hunerî berdewame di çapkirin û belavkirina pirtûkên nivîskarên kurd û pîlana xwe ya sala 2009an  bi çapkirina pirtûka Serok û Merok ya nivîskarê kurd Qado Şêrîn berdewam e. Ev pirtûka hêjayî xwendinê bi naverokek cihêreng dixe nav destê xwendevanên zimanê Kurdî.

Ev pirtûk di nav rêza weşanên Sema derdikeve û ji zincîreya berhemên Sema ya 31ê ye.

Babeta pirtûkê çîrok in û ev pirtûka ku ji 24 kurteçîrokan pêk tê 120 rûpel in ku nivîskar ev çîrok di navbera salên 1993 - 2006an  de nivîsandine.

De bimeşe hevalo bimeşe, rizgarkirina welat hîna dûre

Karîkatêrê li ser berga pêşiyê ji aliyê şêwekar Inayet Dîko ve hatine çêkirin. Û berga paşiyê ji Fermanekê ku bi destxeta nivîskar e hatiye danîn, naveroka Fermanê jî ev e:

Fermana 11an

Ji serokê Rojhilat û Rojava, Bakur û Başûr, divê ji niha û pê ve hûn tenê vê durişmê ‘Bijî serokê me û bavê me ji bo keç û jinên me!’ li şûna ya berê ‘Bijî serok Qilçix!’ bilind bikin.

Ê ji we ji vê duruşmeyê pêve bilind bike, ewê bê xazoq kirin, ta ku bimre.

Serokê we û bavê we...

Qilçixê Xemxur

Ji vê fermanê ku dişibihe fermanên sultanê Osmaniya, naveroka çîrokan diyar dibe û şêweyê nivîskar di nivîsandina çîrokê de xuya dibe, bi awayekî rexne di gel qerf û henekên civakî ku bi zimanekî gelêrî û rehet dixwaze hin aliyên civaka Kurda, saziyên wan ên siyasî, partî û rêvebiran rexne bike û wan hişiyar bike bi wan qilçixên xwe û dixwaze wan qerf û adetên nerind di civakê de bi riya wan nameyên xwe rake.

Belgeya dawî

Qado Şêrîn: Ji Başûrê Rojavayê Kurdistanê ye. Di sala 1967an de li gundê Nehroz ê girêdayî bajarê Qamişlo ve ji dayîk bûye. Xwendina xwe ya seretayî li wir xwendiye, paşê di gel malbata xwe çûne Qamişlo û li wir xwendina xwe ya amadeyî (Lîse) bi dawî anîye û derbasî Enstîtuya Matemetîkê li bajarê Dêra Zorê bûye, çend salan mamostetî li Qamişlo kirîye. Di sala 1995an de berê xwe daye Ewrûpa û li welatê Holenda niştecih bûye û ta niha jiyana xwe li wir didomîne.

Nivîskar, digel çîrok nivîsînê, lîstikvan e û di hin şano yan de derketiye ser depê şanoyê û her bi rolê xwe yê komîdî hatiye naskirin. Wî gelek çîrok û gotar li ser  kovar û malper ên internetî û rojnameyên Kurdî belav kirine. Gelek hevpeyivînên televizyonî pêre bûne. Ji sala 1982an ve karê nivîskariyê dike û pirtûka wî ya çîrokan ya bi navê ‘Serok û Merok’  berhema wî ya yekem e di warê çîrokê de û her weha pirtûkek ji stranên hunermend Mihemed Şêxo (Digel birayê wî Beha Şêxo) amade û çap kiriye.

Her weha xwedanê Malperek enternêtê ye ku di bin navnîşana  www.qadoserin.com  de, hemî babet, nivîs û hevpeyvînên xwe li ser belav dike. Her wisa pênc salan sernivîseriya malpera TÎRÊJ a çandî û hunerî kiriye û di dûv re rawestiyaye.

Hêjayî gotinêye ku Qado Şêrîn, ev berhema xwe diyarî Komîta Fêrbûna Zimanê Kurdî  li Başûrê Rojavayê Kurdistanê kiriye û mafê belav kirin û firotina wê daye wan ku sûdê jê werbigrin di xebatê xwe yê bi rûmet ên di warê fêrkirina zimanê Kurdî de. Bi vê helwesta wî jî birêz Qado Şêrîn, çendîn fidekarê doza netewe û pêşdebirina Zimanê Kurdî ye. 

 Hozan Emîn. Semakurd