 malperaQado
Şêrîn |
|
Qilçix
Ez nêzîk dimrim,
Ê ko mirin di bîr û bala wî de be gunehan nake. Xwendevano, dostno, hevalno, nivîskarno, siyasetmedarno, dê, bav, xuşk û birano; bi xatirê we, li min biborin û li min helal bikin çimkî ez nêzîk dimrim, ezê nêzîk herim nav lepên xweda, hun qet nema min dibînin, yek bi yek lêborînê ji cenabê we dixwazim ko min carekê ji caran bi qestî yan jî bê qestî dilê we hiştibe, an min malê we xwaribe, an min bêbextî li we kiribe, am min bêndera we qulaptibe, an min sînorê we ajotibe, yek bi yek têm destên we hun ê li min biborînin. Min jî wek we hîna mirin nediye, lê ji bîr û bala min nare, mirin tim di bîr û bala min deye û ji ber vê yekê ez gunehan nakim, min guneh nekirine ji bo ko we bi qestî bi êşînim, bextreşiyan nekin û bi rasî bibêjin; ma min carekê ji caran dilê yekî ji we hiştiye?, ma min bi qestî kes ji we birîndar kiriye?, tiştê ko min kiriye, min rexne ji bo me hemiyan kirine, lê dîsa lêborînê ji we hemiyan dixwazim ji ber we dilê xwe ji min girt û we mebesta rexneya min fam nekir, dilê we piçûke, ma gunehê min çiye, we ez şaş fam kirim, hun bi zimanekî dirêj dibêjin; bê rexne nabe, lê dema yekî wek min rexneyan li we dike hun dîn û har dibin, hun kirasê xwe diçirînin, dîsa lêborînê ji we dixwazim. Ko qewîtiyên we li ba xweda hebin li ser maila min bişînin, bi lez û bez bişînin berî ko bimrim û hun poşman bibin Mirin ne xeyd û cudahîya di navbera laş û rih deye, belê xeyd û cudahîya di navbera rih û rih deye. Gelo ko mirin tuneba dê jiyan, dunya, civak û insan çilo û çawa bana?. Mirin dê ji bo min dawiya dexse û zikreşiyê bîne, çimkî mirî dexseyî kesî nabin, mirî ji kesî naqeherin, mirî dilbijandin û çavsoriyan li kesî nakin. Ezê di derya hefteya bêde bimrim, hun dikarin niha bên şîna min, hun dikarin xwe newestînîn jî û neyên ba min, ji ber ezê bimrim ma hunê bên çi, hun dikarin telefona min vekin, na hun dikarin E-mailekê bişînin ji ber telefon bi peraye. Ko hun hatin ba min jî bila di bîr û bala we debe ko ezê qehweya tahl nedim we, ezê çaya cemiiiiiiiidî bidim we, ko ne cemidî be jî ezê perçeyên qeşê bixim nav dako kela dilê we baş hênik bibe. Jixwe yê ko neyê şîna min, telefon neke, E-mailekê neşîne ezê xwe jê bixeyidînim û silavê nema lê dikim, îca hun dizanin, hun azad in. Ma ko ez hîna sax hun neyên serdana min jixwe ko ez mirim ne hun tên û ne jî wer in. Ma ko ez mirim û pêde ezê çilo bizanibim ko hun hatine serdana min. Ma kî ji me dê sax û zendî bimîne, emê hemû bimrin, em li ber deriyê mirinê, di kêferata mirinê de wek gunehkarekî poşman dibin, de ka wer in em ji niha û pêde bes gunehan bikin. Merov bi gelek şêweyan dimre, me şêweyek tenê ji mirinê nas kiriye, şêweyê ko rih ji laş dixeyide û koçber dibe û tu wate ji laş re nemîne, laş genî dibe, bêhn pê dikeve û dibe ji avêtinê re, wê çaxê rih dimîne û her yek ji me rihê wî kesê mirî li bîra xwe tîne, îca dema ko xwediyê wî rihî baş be yan xêrxwaz be em wî bi baştî li bîra xwe tînin, lê ko xwediyê wî rihî şerxwaz, zikreş û kîndar be em hemû lanetê lê dibarînin. Îca kîjan rih başe, rihê xêrxwaz an ê şerxwaz.. Jixwe li gor felsefeya kalik kalikê me Zeradeşt dawiya dawî serkeftin ji xêrxwazan re ye. Diyare merov bi gelek şêweyan dimre, dema merov xwe ji civaka xwe qutbir û dûr bixîne û xwe jê bişo merov di nerîna wê civakê de mirîye û ev raste ji ber ko rih ji wê civakê qut dibe, ji ber ko laş bê rih nabe û têkiliya me bi rihan reye û ne bi laşan reye, rih û rih têkiliyan bi hevûdu re datînin û ne laş û laş, laş bi rola rih radibe, em laşan ji bo çavan dibînin, laşê bê rih ji çi reye?. Rihê şerxwaz û rihê xêrxwaz nabin dost, rihê şêrîn û rihê tahl nabin dost, du kes nikarin ji hev hez bikin ko rihên wan ne nêzîkî hev bin, ango ko rihekî hevbeş di navbera wan de tunebe, dostanî, evîndarî jî wisa ne. Ez çima ji dilbera xwe hez dikim?, ji ber rihekî hevbeş di navbera me de heye, ez çima ji filan kes hez dikin û ji bêvan kes hez nakim, li gel ko cugrafiya laşên her duwan mîna hev in, lê ji ber rihên wan ne mîna hev in. Dema merovek tiştekî bê dilê xwe dike, yan jî dema em tiştekî bê dilê wî bi wî dikin em dibêjin; bi mirna wî bû. Ko ez û tu nivîskar bin, ko ez û tu hunermend bin, ko ez û tu dost bin, ko ez û tu siyasetmedar bin û tu bi şêweyekî ji şêweyan hewldanan bide ko min bişkînî dako tu biserkevî, dêmek tu mirina min dixwazî û ev jî şêweyek ji şêweyên mirinê ye. Bêbextî û derew li hevûdu kirin jî mirine.
Bi xwendina vê daxuyaniya dawî re ko ji min derdiçe, ez zanim hin kes di nava xwe de nifiran li min dikin û dibêjin; xwezî rast be, xwezî birastî bimre dako em jê rihet bibin. Îca ez ji wan kesan dipirsim; di bext û ujdanê we de, ko bext û ujdanê we hebe min çî nebaş di derheqa we de kiriye ta ko hun nifiran li min dikin û dixwazin ez bimrim. Her yek ji me zindiyan dujmin in wî hene, ez jî dizanim ko dujminên min hene û xêrê ji min re naxwazin, jixwe dujminê hov dixwaze yan ez bimrim yan ew min bikuje. Wek nimûne Pasmark û Hitler, yekî Elmanya ava kir û yekî wêran kir. Wek Garîbaldî û Mosolînî, yekî Italya ava kir û yekî wêran kir, îca hun jî dikarin weke Pasmark û Garîbaldî bin hin ji bo xwe û hin jî ji bo milet û welatê xwe, dako piştî hun bimrin nalet li we nebare wek ko li Hitler û Mosolînî dibare. Ko mirin di bîr û bala we de be hun ê wek pêxemberan bin, hun ê ji xêra pêve nekin, hun ê ji hezkirinê pêve nedin. Ma hun ê wek min nemrin?. Mirin ji bo hinan derman e, ji bo hinan rihetiye, ji bo hinan malwêraniye, lê ji bo min jiyan e. Helbet em ê hemû bimrin û kes ji me ji ber nafilite, tu kîbî tê bimrî, tu dewlemend bî yan parsek layê parsekan bî, tu serok an kole bî. Feqeyê Teyran dibêje(bibor in malika sêyemîn baş nayê bîra min): Ne Şêt ma ne Nûh ma ne Yûnis ma ne Curcîs ma ne………. Ne Eyûbê birîndar e Ne calînos û Suqrat ma ne Tatalîs û Yeqrat ma Ne Zulqurneyn û Mir`at ma ne cum-cum ma ne ixbar e Min sînorê kesî ji we ne ajotiye, min bêndera kesî ji we ne qulaptiye, min motka bin mirîşka kesî ji we nedizîye, min tinazên xwe bi kesî ji we nekiriye ji bo ko we bişkînim, ev ne ji exlaqê min e. Min carekê ji caran rexneyek li dostekî kevn kir, ne li kesê wî, na na, li helwesta wî wek nûnerê partiyekê, lê mexabin ev bêtirî salekê silava xwedê jî li min nekiriye û li gelek deveran jî şerê min dike, ma ev ne kuştin e, ma ev ne mirin e, li gel ko ez û wî ta wê gavê wek şîr û şekir bûn. Carnan merov di navbera xwe û kesê xwe de dimre, merov ji rihê xwe ditengire, û rih dide ber bazara mirinê. Ew ên xwe dikujin mirin bi wan şêrîn dibe. Ma gelo mirin ne şêrîn e?, ko ne şêrîn û derman ba em nedimrin. Di demekê ji deman de mirin ji bo me hemiyan dibe derman û şêrîn dibe li gel ko kengî be emê hemû bimrin. Ez yek ji wan im, ew ên ko mirin ji bîr û bala wan naçe. Îca bang li we dikim ko hun jî wek min bin û bila tim û tim mirin di bîr û bala we de be dako hun gunehan nekin, bêbextiyan nekin, şaşiyan nekin, ji ber piştî mirnê merov poşman dibe û merov nema dikare tiştekî bike. Jixwe min hîna mirin nediye û ji ber ko min hîna nediye nikarim li ser tecrubeya xwe bi mirinê re binivîsim û ev tecrubeya min a herî têkçûyîye. Rih namrin. Dema merovek dimre û bin ax dibe, laş bin ax dibe û ne rih, rih zendî dimîne, û em ji wî rihî fêrî hin tiştan dibin, çimkî tecrubeya wî bi me zendiyan re bi dawî dibe, dema em wî li bîra xwe tînin em wî wek zendiyekî bi bîr tînin. Carnan tiştin tên pêşiya merov ji merov weyê ko berê ev yek bûye, ev raste ji ber bi rihê merov re bûye. Bi min re gelek caran wisa bûye, tiştin tên pêşiya min ji min weyê berê ev yek bi min re bûye û ez dizanim dê çi çê bibe, naxwe rihê min berî ez ji diya xwe bibim dijî û zendîye, di demekê de dikeve laşê min û wekî din mîna rihekî nenas di nav rihan de dimîne. Ez îro danê sibehê li ba textorê xwe bûm, ji bo ko ji min re diyar bike di çi rojê de ezê bimrim, wî got: dilê te gelekî westiyaye..gelekî..gelekî..te gelekî hez kiriye..te ji her kesî hez kir..dilê te ji dû hezkirinê westiyaye û ji ber vê yekê tê bimre ji ber dilê te nema dikare kar bike. Do merovekî min, li Polenda dijî telefona min kir û got: xeyo bila tu sax bî, rehma xwedê li te be, xweda te bi dilovaniya xwe şa bikî, wele tu zilamekî baş bû, çima tu mir loooo?, weleh hîna zû bû, naxwe ez nema te dibînim?!. Ez niha tenê me, çi dema ez bûm dido û bi quloç ezê bimrim, masiyên piçûk hevûdu dixwin lê Nehing hemiyan dixwin. Qewîtî: ji hevûdu re baş bin, ji hevûdu hez bikin, li hevûdu guhdarî bikin, hevûdu bipejirînin. Termê min li derveyî sînorên kurdistanê wek ê sehekî navêjin.
Ji bo şînî û bexşandinê: Tel: 0031-624142097 Mail: qadoserin@hotmail.com * * * Terqîna Azadê Hesko Qado layê Şêrînê Tu li vê dinyê namînê Çiqasî em li ser te bixwînin Quran û Incîl û yasînê Bi wî xwedayê mezin Tu cunetê bi çavên xwe nabînê * * * Sersaxî
Qado Qado....bibûre miriyo ez dizanim ku tu nikare niha bersiva min bide ji ber wilo jî ezê dilê xwe li te hînik bikim, û çi tiştê bê ber devê min ezê bêjim. Ma tu nizane hey belqitiyo ku gotina rast vê demê ji kuştinê mezintire, ma tu nizane hey xwedê li wê dinyayê (mesix) kiro ev dema zêr û zoryê ye, heme ta sibehî bere tu rast be, mane nehêjaye pîvazeke xerabe, ka bêje law ka çiqas perê te ji bilî qama te ya qut û serê teyî rût hene, ka kê xwe daye pişta te ka çend dostê teyî ji dil dost hene .....pûçe. Ev terqîna teye lo..... Ey qado....kurê şêrînê....jibîr neke soza ku ji dinyayê tu pê derketî, ta ji te were derwîn be û zanibe xwe bi mirovan şêrîn bike tevî tu derewan li wan bikî. Heger herdû firîşte ango munkir û nekîr hatine ba te û tu dane bersivdan tu netirse ji ber ev karê waye, bi zimanekî vekirî bersiva xwe bide, bere tu mêr be weke ku tu dijiyanê deyî, bêje min tu roja zordestî li tu kesî nekiriye, min tu carî gotina derew bawer nekiriye ez tu carî nebûme kolê zêr û nerastiyê.
Ey qado ...kurê şêrînê...tu niha miriye û te li
pişt xwe hiştiye xweşiya jiyanê her timî ya rast bêje.
Her tu bi mirina xwe şad û bextewer bê. Her
bijîn yên mirî. Jibîr neke cîkî min vala bihêle lo..bere.
Qamişlo * * * Birayê hêja Qado: Rêz û silav, Bawer bike ko bi çûna te ez gelekî dilteng im û wek te got tekez keyfa pir pîsan bê, emanet Qado du sê pirsên min ji Xwedan hene heger tu kari bî ji dêvla birakê xwe jê bipirsî: 1-“Ji pîso pirsîn: pîso çima tu pîs î? Got çi bikim xwedê li aniya min nivîsî”…!!! Ji yezdan evê pirsê binase; bê ka raste ewî li aniya wî nivîsî…? 2-“Ne ji gelacan ba wê gur û mî bi hev re biçêriyana…”!!!Ez dixwazim binasim bê ka wê li wê dunyayê çi evan gelacan bê… 3-“Mirîdan gazin ji Ehreman kirin; ko cihê wan li dor êgir ne xweş e…!! li wan vegerand ê ko cihê wî ne xweş be, bela cihê xwe bi ê min biguhêre”{ helbet ew di nîveka êgir de bû û mirîd li derdorê wî bûn…?? Pirsa min gelo wê ev mirîdana bimînin mirîd an rojekê ji rojan wê ew jî bibin Ehreman û di nîveka êgir de rûnin..?? 4-Li min negire ez dizanim tu bilezî; lê pirsek tenê maye gelo çima tîpên kurdî kînok in û hevdu negirtîne?? 5-Wekîlê me û silavan li her kesê ko li me bipirse…. Hevalê te Ezîz Xemcivîn * * * Qadoyê Şêrîn ey miriyê ne mirî, ey miriyê sax û xweş ...... ... Qadoyê ne rihmetî ..... ango hîn tu bi tememî ne çûye ser dilovaniya xwe , rêz û silav û gulavan bi xwe re bighîne kesên ku tu rastî wan were ,
Qado .. feqet du mirovan ji dinyayê dizanin ku
berî mirina wan ewê bimrin ... Qado Şirîn û Ghazî Kanaan ... de
ne xeme looo . silav bike wan sirûdên şewitî ji alava gurr agirê xwedê hebmêz bike wan Horiyên ku ji AL-Qaade re hatine hazir û dorpêç kirin . lê weseka min li te be .... qet ji bîra neke .... û bike guhar di guhê xwe ke berî her tiştî divê tu biçî destên bavê Globalizma yekem ( Adem û Hewa ) biramûsî . lê bera haya te ji bazirganên şerê bira kujiyê ( Qabîl û Habîl ) jî hebe . wan jî demekê ji xwe re du dewlet û du hukûmet û du serokatiyet û du perlemaniyet û .. û 2 û 2 û 2 ava kiribûn wek Kurdistana me ya başûr . lê yekê dibêjim û yekê jî ji bîra dikim ..ax .ax.. .... hate bîa min ... hema birayo şûşeyek ji benzîna Qereçûkê jî bi xwe re bibe ... ta ku tu hemû quroçiyan û Caaşokan pê bi şewitînî, lê divê tu biçî serdana Zarokên Sînemeya Amûdê bikî û semawenda wan jî ji aliyê Hevgirtina Rewşenbîrên Kurdên Rojava ve pîroz bikî ... ...ha ha ha Qado yek deqe ... mumkine ku tu û Seddam Hussein jî rastî hevdû werin di mizgefta Helebçe de .û li dawî ... qurban û heyran .... ger bi rastî ( 40 ) horiyan teslîmî mirovan dikin .. aman haaa aman ji kesekî re nebêje ji bilî birayê xwe ....hêvîdarim ku tu bimrî ...bi mirineke gulgulî û sirûdin şewitî û çivîkin beravêtî herbijî Qado di dojeha sermedî de bijî Kurd û Kurdistan Inayat Dîko (Karîkatorîst).
dikoo@hotmail.com * * * Hevalê Hêja û Berêz Kek Qado Şêrîn, Dema min Gotara te bo mirêne xwend ez baş tê gihiştim ko mebesta te ji mirêna te çiye û çima tu mirêna xwe zû dixwazî ? Helbet tu xwe serbest nabînî ko rexneyan li dor hêla xwe bikî! an tiştin çewt dema tu bi çavên xwe dibinî lê tu ne serbestî bo gotina raste rast. Ez hêvîdarim ko hemû armancên te pêk werin û tu nava bihustê da bijî. Bihuşt ne bes li axretê ye, helbet li vê cîhana me ya ko em lê dijîn jî. Kekê Qado, Bila sebra te fereh bî wê hemû armancên te di rojên pêşda wê bi cî werin. Dunya me zor tê guherandin û gelê me jî wê xwe biguhêre li gora şert û mercên dewrana vê Gerdûnê. Hêviya xweşî û serkeftinê bo te daxwaz dikim. Lê ji bîr meke yên wekî te pirr pêwistin di cîhana me da hebin bo te jiyaneke dûr û dirêj daxwaz dikim. Silav û Rêz Seîd Mistefa
Australiya * * * Mamostayê delal û hêja....roj baş weke hevalê tenî li polonya yê got xwedan te bi rehma xwe şa bike..lê bila tu sax bî.. bi rastî min go qey bira tiştekî wisa heye ..û min xwest ez bixwînim hetanî dawiyê..lê mala xwedê ava ku ne rast bû..mamosta ma mero wisa datî ne li ser mirina xwe. lê bi rastî daxwiyaniyeke, yan jî nivîseke pir bal kêş bû..pir nûjen bû..raste emê giştik bimrin ..lê bawerke ez bi xwe nerîna min ji mirinê re ji xwe ez nizanim mirin çiye jî ez qet têde raman nakim..heta ji min tê ez tişê baş dikim û xirabiyan nakim, motkê li bin mirîşkê kesî nadizim..û ez di mirênê de qet nafikirim ez xwe dikim xwedayê xwe û mirina min bi destê mine heta ji min tê ez xwe nakujim..jiyana min nuha xweştire.. lê kefa min pir ji nivîsa te re hat bawerke min sê caran xwend pir bal kêşe ..herkes ewê bixwîne û ji te re binivîse yan jî were şîniya te û tu sax.. ma jê xweştir heye mamostayê min xwezî min jî karîba tabloyek wisa xurt çêbikra û bila ez piştî wê bimra ma......... kêfa me pir ji te re tê..û silav û rêz Raxib Sosanî (Şêwekar). * * * silav kekê Qado Şêrîn Tu miriye, je ber wilo min nikarîbû ji te bipirsim bê tu dihlî ez gotara te daxim malpera amude.info, heger tu sax ba minê ji te bipirsiya lê mexabin tu miriyî, ji ber wilo min bê izna te gotara te daxist malpera amude.info. Te çi tiştê min xwaribe, dizî be, an bê izna min birbe ez li te halal nakim xwedê heyfa min û a hamû xelkê ku te tade li wan kirbe je te re nehêle. sila û rêz li te û kefenê te be. Birayê te bîlal Alûcî (amude.info).
|
|
|
|
