Qilçix

Miletê me van rojan û bi helkeftina salvegera yekemîn ya serhildana 12 avdarê li rojavayê kurdistanê û her wisa li gelek deverên din, bê sebr û aram li benda helwesteke xurt û bilind bû ji partiyên xwe, ji bo pîrozkirina yekemîn salvegera serhildana 12 avdarê. Mexabin çiya za û kêstekek anî. Piştî axaftineke dûr û dirêj û bi dehan civîn û bi sedan çixare kişandin, helwesta herî qels û ne li gor hêvî û xwesteka milet û dayikên şehîdan, derket.

Hevbendiya Demuqrat-Eniya kurd-Hevgirtina Gel û P.D.kurdî Li Sûryayê di daxuyaniyeke(03/03/2005) xwe de xwestine ko katjimêr yazde 5 deqeyan rawestin û xwepêşandaneke aştiyane li Şama paytext li darkeve.

Partiya Yekîtî jî bi tenha xwe daxuyaniyek belav kir, û çûna ser gorên şehîdan li wan zêde kir.

Diyare ji bo çûna ser gorên şehîdan du daxuyanî derketine, çima ne yek daxuyanî, ne ez û ne kesekî din nizane çima. Ya din ya ko ji bo min cihê pirsêye; gelo çima rawestana 5 deqeyan katjimêr yazde ye?.

Li hin cihan tê ragihandin ko hevrika Ereb beşdariyê di xwepêşandana Şamê de neke berpirsên daxuyaniya 03/03/2005 jî naderkevin li gel ko ev yek di daxuyaniya wan de ne diyar e. Her wisa Partiya Yekîtî diyar dike ko ewê xwepêşandana aştiyane li Şama paytext li darxînin ko hevrika Ereb beşdar be an na.

Lê ko hevrika Ereb beşdarî di xwepêşandanê de kir, gelo dê her du bibne yek an na?.

Ya ko ez dixwazim bibêjim û binivîsim;

1-di her du daxuyaniyan de gotina serhildanê derbas nebûye, wek bûyer hatiye bi nav kirin.

2-serhildana 12 avdarê ji bo berjewendiya gelê me pêknaynin.

3-her du daxuyanî ne li gor hêvî, xwesteka gel, serdem, şehîd û serhildanê ne.

Ji ber vê yekê tevgera me hewcedarî xweguhertinê ye, hewcedarî nûkirinêye. Ji ber û wek ku ji kar, xebat, tevger, daxuyanî, rabûn û rûniştina wan diyare ew ne li gor serdem û xwesteka milet in. Û xweguhertin û nûkirin ew e ko ew serok û merok bi destên endamên zikêş bêne qewitandin, ji ber ko diyare ew serok û merok wek rêjîmên diktator dê li ser serên wan partiyan bimînin ta ko sax bin û rê li pêşiya raman û dîtinên nû dê venebin. Ew mêrantiyê di xwe de nabînin ko helwesta rast bidin, her wisa ji dehên salan diyare ko wan tevger bi paş de vegerandine û li pêş nexistine.

Ez nêzîkî dîroka wan ya ji 1957an û ta bi niha nabim, lê piştî rûxandina rêjîma Sedamê diktator li Iraqê, û rewşa rêjîma Sûryayê ya ko ji rewşeke hoviyane dikeve rewşeke hoviyanetir ji ber ko rêjîmeke bi hoviyane bi serdem û merovan re têkiliyan dike, gereke tevgera me ya kurdî jî li gor guhertinên ko di herêmê de dibin û her wisa li gor hêvî û xwesteka milet bin li dujî rêjîma Sûryayê. Hin partî ko ne hemû bin dibêjin ; « niha ne dema van çalakiyane, ji ber ko welatê me Sûrî ne di rewşeke baş deye ». Gelo kîjan rojê rewşa Sûryayê xweş bûye ji dema ko partiya Ba`as hatiye ser desthilatdariya Sûryayê, her û her di rewşeke xerab deye, bêguman hemû rêjîmên diktator wisa ne, rojeke xweş nabînin û ne jî dihêlin ko miletên wan bibînin.

Li dawî, ko tecrubeya başûrê kurdistanê li Rojavayî kurdistanê dubare bû, gelo tevgera me jêre amade ye ?, yan jî ew xwe bi xwe ji bo serokatiyê dê bi hev kevin, û ji ber vê yekê jî gerek tevger bi guhertina wan serok û merokan bê guhertin û bi yek be. Ji bo ko dîrok û berebabên bên we şermezar nekin, ya baş ko hun xwe biguherînin. Hun di ber her tiştî de berpirsyarin.

09/03/2005