Qilçix

-----------------------------

Fitwa kurdayetiyê

Fitû; qedexe, yan jî erêkirina ko ji hêla zana û alimên misulman ên mezin derdiçe, dako li gor misulmantiyê jiyana merovan bê rêxistin û pirsgirêk çareser bibin.

Di dema dawî de gelek fitû derçûn, ji misulmanan bi giştî û ji ereban bi taybetî, hema kî rabû fitwek derxist, gelek tiştan qedexe û gelekan jî erê dikin, gelek caran jî yên ko fitwan derdixînin bi hev dikevin û hevdû dikin deyûz û derewçîn. Hema çi di berjewendiya wan de be fitwê jêre dibînin.

Hin nimûne ji fitwên wan ên îsal;

-kujtina Mîkî Maws erkek misulmantiye.

-vexwarina mîza deveyan hilal e.

-nabe jin xiyar û mozan bikirin, eger hat û kirîn cezayê wan guh û pozjêkirine.

-zewaca bi keça 9 salî re û di dûv re bi ya yeksalî re çê dibe, çimkî ev yek dê mêran bextewar bike.

-dako jin bikaribe di eynî odeyê de bi mêran re kar bike, divê jin di roja pêşî de çiçkên xwe bixe devên wan û ew ji şîrê wê vexwin. Jina ko wisa neke qehpe û cezayê jina qehp di misulmantiyê de naskirîye.

-pereyên sosyalê li misulmanan hilal in, çimkî malê gawiran hemû yê misulmanaye.

Ev çend nimûne bûn ji fitwên îsal. Her Şêxek, alimek, rêberek ereb û misulman rabûye û ji bo berjewendiya civak û dewleta xwe fitwan derdixîne, hema çi di berjewendiya serdest û rêjîman debe fitwê jêre dibînin. Li dawî her tişt ji bo wan rewaye, lê ji kurdan re qedexeye, eger pêxemberekî kurd rabe û fitwekê derxîne dê baweriyê pê neynin û wî bikin deyûz û nokerê Israîl û Emerîka, îca min ev bar avêt ser milê xwe û fitwa gelek pirsgirêkan derxist, çi dibe bila bibe, bila min bikin deyûz û tiştin din. Bi hêviya ko hemû kurd bi fitwên min bikin:

-merovê kurdekî/ê bi maf an bê maf bikuje bihuştê bi çavên serê xwe nabîne.

-kurdên bi tirkî û erebî û farisî biaxivin û bi taybetî bi zarokên xwe re, ne kurd in, her wisa bê şeref û bênamûs in.

-kurdên xwe ji kurdîtiyê bêrî bikin bêtuxm in. Cihê wan ne li erd ne jî li asman tune.

-kurdên ji firoşgehên tirk û ereb û eceman bikirin kurdîtiya wan qels e û aboriya serdestan xurt û bilind dikin. Cezayê wan poşmanî û jahra silêmanîye.

-kurdê bi zimanê serdestan binivîse alîkariya serdestan di têkbirina zimanê kurdî de dike.

-kurdê bi kurdekî din re bi zimanê serdestan biaxive xiniz û bêtuxm e.

-jina kurd divê bi dujminan re nezewice, çimkî kurda ji dujminan mêr bike, dikare mîna laşfirosan jî kar bike.

-kurdê wêneyê Etaturk dalqîne, bi tirkî biaxive, bi zarokên xwe re bi tirkî biaxive û navên tirkî li zarokan bike, dibe hevparê dîroka tirkan a reş û tarî.

-kurdê li dujî berjewendiya gelê xwe derkeve û di partiyên dujminan de kar bike, kurdekî xayîn û xwefiroş e.

-kurdê xêr û xweşiyê ji birayê xwe yê kurd re nexwaze, bihuştê bi çavên serê xwe nabîne.

-kurdê li jina xwe xîne, wê bikuje, zulmê lê bike, cihê wî dojeh e û dilê wî tim çelqo melqo ye.

-kurdê karibe xwe fêrî xwendin û nivîsandina kurdî bike û neke, û bi zimanê serdestan re bijî, xwefiroş û nebûna wî baştire.

-kurdê bi qestî yan bê qestî gotinên zimanên serdestan bixe nav axaftina xwe û bi kurdiya petî neaxive, zimanê miletekî têk dibe û tune dike, helwesta wan nekêmî ya tirkan e. Cezayê wan qewitandina ji dinyayê ye.

-kurdê koletiyê ji serokê partî û ne partiya xwe re bike, ji diktatoran hez dike û ne azadîxwaz û ne jî demuqrat e. Her wisa serokê ko kurdan parçe bike, kurdan fêrî hezkirina xwe û dujminan bike, tim bêje wek min raste; kurdistanê di kesayetiya xwe de qambostî dike, dictator e û cezayê wî gelek giran e.

-kurdê aştî û biratiya kurd û ereb, kurd û tirk, kurd û firsan bixwaze, dujminan dike xwedî û hevparê kurdistanê, cezayê wan laneta dîrok û berebabên bên li xwe dibarîne.

-………………….

Dako barê we giran nekim, ta sala bê nema fitwan didim, tenê ko li we teng hat ez birayê we me, xwe bavêjin derya fitwên min û îşê we jê nebe…û hûn sax.