Çîrok

Serokkirîn

Kongirê partiyê yê di 20/09/2001de li gundê Nehroz lidar ketibû, vê carê ne normal bû, ne
tenê ji ber ku piraniya nûnerên herêman amdebûn û yên jinan jî, belê vê carê ta bi nûnerên
Zarokan jî amedebûn, kongir sê roj û sê şevan berdewam kir, axaftin di babetekê de diçû û
dihat; çilo û çawa dê serokekî nû ji bo partiya xwe hilbijêrin..? da partiyê bi demê re bighîne û
ber bi pêşxistinê de bajo, nûnerekî di gotina xwe de gotibû: partiya me ji ber partiyên dî ve
gelekî li paş maye û ev jî wek tête diyar kirin ji serokê giştîye, diyar e em di hilbijartina
serokan de nezan in, ya dî em kurd ji partiyekê tenê em serokê giştî dinasin, ew baş be partî
hemû baş e û di xêra xweda de ye, xerab be jî partî hemû xerabe, hemû kar û xebat, pêşveçûn
û paşveçûn li serokê giştî vedgere, di paş re nûner a jinan gotibû ku ji ber vê yekê divê em
serokekî hilbijêrin ku milet hemû li dor xwe bidî hev.
Kongir sê roj û sê şevan dirêj kir, ta ko biryara dawî standin, geh axaftin sar dibû geh jî germ
dibû, di çaxê bênvekirinê de jî hemû di vê yekê de mijûlbûn ji bilî Zarokan ên bi gogê dilîstin
namaze nûnerê wan lîstikvanekî jîr û zana bû, fanêlekî zer lêbû, navê xwe û nemra 10 an li ser
çap kiribû, bi wateya ko ew lîstikvanekî Berazîlî ye, di roja sisiyan de jî hîn ew ne axiftibû,
navê wî di lîsta gotinbêjan de tunebû lê sikretêrê komîta navendî û liser daxwaza wî destûr da
ku ew jî tuştekî bibêje, ji ne çarî hemiyan li wî guhdarkirin, wî got:
-Di cîhana gogê(Footbol)de piraniya tîmên cîhanê wek Barşelona, Riyal Madrîd,
Manişister Unaytid û Latisyo Roma rêzên xwe bi lîstikvanên biyanî xurt dikin, bi
melyonên dolaran lîstikvanên baş û zana dikirin an jî kirê dikin da ji wan re bilîzin,
vêga em jî dikarin serokekî baş ji partiya xwe re bikirin an jî kirê bikin !!.Hemiyan bi
mat li hevûdu nêrîn û gotin:
-Bi xweda te tenê ya rast û durust û hêja got. Endamekî wisa got û biryar bi vê yekê
standin.Yek ji nav koma endaman rabû ser pêyan û bi dengekî bilind got:
-Ez çavê te bixum, tu yê kê yî loooooooo, xweda te bihêle..?.
Ev yek hîn di tevaya dunyayê de nebûye, helbet dê bûyer û nûçek hêja û rojanebe ji bo hemû
rojnamegeriya cîhanî, partiya me wê ya yekemîn be ku vê yekê dike û ne dûr e ku partiyên dî
jî vê yekê bikin, helbet dê wisa bikin da partiyên xwe pêş de bajon, kirîna serokan ji bo
partiyên rojhilat zor gerek û pêwist e, hin ji bo li hev guhdar kirinê, hin jî ji bo demuqratiyê;
Ev serok dê me fêrî gelek tuştan bike ku ta niha em jê bê par in, endamekî wisa ji xwe re
got û pirsî:
-Lê, gelî hevalan ka hûn kê li ber çavan dibînin da em wî ji xwe re bikirin û bikin
serok ?
-Ronaldo…, zarokekî wisa û bi ken got lê kesekî deng nebir xwe, merovekî rîspî li kêleka
wî ya çepê rûniştîbû jê pirsî:
-Ew çi kes e û çi dike..?
-Mamo ew Berazîlî ye, di tevaya cîhanê de kesekî weke wî jîr û zana di gogê de nîne,
lê pir buha ye haaaa!!.
-Çavê mamo em pirsa serokan ji bo partiya xwe dikin, çi çaxa me Kurdistan rêzgar
kir em dê wî yê te got bikirin, bila ji me re bi gogê bilîze, te got navê wî çi bû..?.
-ez serok merokan nas nakim, ez tenê gogê û yê bi gogê dilîzin dinasim, ê zarok wisa
bersiva xwe da û bê deng danişt, di dema ku di nava xwe de pir aciz bû û digot çima ev kes li

ser gogê na peyivin ma ji siyasetê ne baştir e, ez dizanim çima ew li ser gogê napeyivin ji ber
ew tiştekî li ser nizanin, ku zanîbana helbet dê biaxivyana da xwe qure bikin, ji bo ku li
zarokekî weke min guhdar nekin li ser gogê napeyivin, wî bahwer nedikir çi çaxî kongir bi
dawî bibe û bi gogê bilîze.
Nûnerê herêma bakur rabû ser kab û nîvekê û destekî xwe bilind kir, çi mirovê axaftina wî
heba wisa dikir, da herkes wî bibîne, wî got:
-serokê em bikirin divêt Ewrupî be, çimkî Ewrupî pir demuqrat û dilovan in û bi
mafê mirovan re ne!!.
Ji nav hemiyan rîsipiyek rabû ser pêyan û pêşniyarek da û got;
-her kes dikare navekî pêşkêş bike û di dûv re em dê wan navan daxînin hilbijartinê.
di dema ku pelik belav kirin û dan ser hev çar nav hatin meydanê, Con Mîcer, Hilmot Kol,
Nîlsom Mandêla û Bil Kilînton, ji bo hilbijartina navekî ji van navan kongir rojeke dî ma, di
heman demên dawî de ev pirsgirêk çareserkirin. Dema herçar navan deng wekû hevûdu anîn,
çar partî ji kongir derçûn.

Holland -19/01/2002

*xelata yekemîn a pêşbirka kovara Zevî ya ji bo kurteçîrokê wergirt.